Plantun de Prouvènço

Pèr coumpara dos planto d'encò nostre

Nigella hispanica & Panicum barbipulvinatum

Nigella hispanica

Ranunculaceae

Noms en français : Nigelle d'Espagne, Nigelle de France.

Descripcioun :
La nielo-bastardo trachis dins li champ de cerealo. Mai emé lis erbicide, es uno planto que se vèi pu gaire. Ei pulèu basso (20-50 cm) e tambèn forto. Fai de poulìdi flour bluio. Pèr la destria de la pato-d'aragno que ié sèmblo, fau regarda que i'ague ges de bratèio que remounton sus li bord de la flour. Mai li fru se sèmbon pas. Coumpara emé Nigella damascena.

Usanço :
D'estùdi an moustra que la nielo-bastardo caupié de mouleculo bono pèr lucha contro li baterìo. Dins d'ùni païs dóu levant, sa cousino Nigella sativa èi cultivado pèr n'en faire la recordo de grano coumestiblo.

Port : Erbo
Taio : Pancaro entresigna
Fueio : alterno
Tipe bioulougico : Teroufite
Cicle bioulougico : Planto de l'an

Gènre : Nigella
Famiho : Ranunculaceae

Ordre : Ranunculales

Coulour de la flour : Bluio
Petalo : 5
Ø (o loungour) flour : Pancaro entresigna
Flourido : Estiéu

Sòu : Ca
Autour basso e auto : Pancaro entresigna
Aparado : Noun
Remarco : Champ de cerealo

Liò : Champ - Escoumbre e proche dis oustau - Meissoun
Estànci : Termoumediterran à Subremediterran
Couroulougi : Pancaro entresigna
Ref. sc. : Nigella hispanica L., 1753 (= Nigella gallica Jord., 1852 )

Mi(-de-ribeirés)

Panicum barbipulvinatum

Poaceae Graminaceae

Noms en français : Panic des rivages, Millet des rivages.

Descripcioun :
Aquéu mi fèr, que nous vèn d'Americo de l'uba, sèmblo proun au mi-prim, Panicum capillare, que se rescontro proun dins lis ermas e li champ à l'autouno. Se n'en destrìo emé sis espigueto de coustat que soun pourtado pèr de pecou courtet (< 3 mm) e que rèston proun proche de la ramo (< 10°). D'un biais generau lis espigueto soun mens aluenchado lis uno dis autro. Apoundèn qu'aquéstis espigueto soun mens grosso e pu fino. Pèr l'ouro es esta vist soulamen dins la valado dóu Rose, mai poudèn pensa qu'aquesto meno vai s'espandi. Coumpara emé lou mi-prim e lis àutri mi se n'avès pas l'usanço.

Usanço :
A bessai li mémis usanço que soun cousin lou mi-prim.